Гостиварци во недела на протест со блокирање на пат – СТОП Русино, чист воздух за Гостивар!

Граѓанската иницијатива Стоп Русино, чист воздух за Гостивар во недела (5 јули) организира мирен протест, кој е насочен против палењето на депонијата, како и дислокација на Русино.

„Целта на протестот е стопирање на палење на депонијата, нејзино затворање и дислоцирање. Русино гори веќе непрекинато неколку месеци и е без стандарди да се нарече депонија, не труе нас граѓаните на Гостивар и околината. Го загадува воздухот, почвата и водата и со тоа е нарушанео нашето здравје.“, се вели во известието за граѓанскиот протест.

Според најавите, протестот ќе се одвива на патот долж гостиварска патарина до здуњска раскрсница, од 17 до 19 часот. Едната лента од патот ќе биде оставена слободна за евентуална потреба на возила од Итна помош, полиција, армија или пожарна.

„Протестот е граѓански и забрането е политичко агитирање и користење на партиски маици, знамиња, и други симболи. Таквите ќе бидат пријавени во полиција како провокатори“, велат од иницијативата од кадешто нагласуваат дека протестот ќе се одвива со строго почитување на мерките за заштита од Ковид.