Гостиварскиот „Мост на демократијата“ ќе биде готов во април (фото)

Изградбата на новиот мост на реката Вардар во Гостивар, влегува во завршните фази. Денес на терен започна поставувањето на бетонот, по што ќе следува асфалтирање. Според најавите, мостот кој ќе носи име „Мост на демократијата“, ќе биде пуштен во употреба на почетокот на месец април.

„Со изградбата на мостот го решаваме најголемиот проблем во сообраќајот и повеќе нема да има сообраќајно оптоварување во центарот на градот. Го нарековме „Мост на демократијата“ затоа што е првиот мост што се гради во Гостивар во демократскиот систем.“, рече во својата изјава градоначалникот Невзат Бејта, кој заедно со своите соработници беше да го проследи текот на работите на терен.

Мостот ќе има четири коловозни ленти, со надградба на пешачка и велосипедска патека од двете страни. Предвидено е да биде долг 42 метри и широк 20 метри.

Изградбата започна кон крајот на мај, минатата година. Проектот чини околу 380 илјади евра, пари кои се обезбедени преку меѓународна соработка, со Фондот за развој на инфраструктурата на општините со седиште во Луксембург.

Изведувач на работите е градежната компанија АД „Пелагонија“ од Гостивар.