Градинките во Гостивар првиот ден згрижија 117 деца, строгите правила се почитуваат

Најмалите го скршија мразот и повторно зачекорија во градинките. По половина година пауза предизвикана од ковид пандемијата, гостиварските градинки денес ги отворија вратите за дечињата. Заради заштита на нивното здравје, како и здравјето на воспитувачките и негувателките се почитуваат строгите правила, предвидени во протоколот.

Вработените носат маски, групите не се мешаат, рацете се мијат често, а се дезинфицираат и масичките и другите работни површини. Температура со бесконтактен топломер мора да се измери на секој што влегува во објектот и при прием на децата.

„На влез на децата им се мери температура, и доколку не е покачена по дезинфекција на рацете, детето го презема неговата воспитувачка. Во занималните се води грижа да се држи растојание и одржува хигиена. Децата јадат во своите занималани, а секое дете за спиење има по две постелнини. Ние се трудиме максимално престојот на дечињата да биде безбеден. Може да кажам дека денешниот прв ден поминува со почитување на протоколот и сите правила, во мирна и убава атмосфера.“, изјави Мирјана Мицоска, директор на детски градинки во Гостивар.

Интересот за згрижување на деца во градинките во Гостивар отсекогаш бил голем, а листите на чекање долги. Сепак, сега согласно протоколот се формираат помали групи и капацитетот се преполовува. Во првиот ден згрижени се 117 дечиња и има место за уште толку.

„Според протоколот градинките во Гостивар може да примат 321 дете. Денес дојдоа 117. Се надеваме дека во наредните денови и други родители ќе ги донесат децата, затоа што имаме капацитет за повеќе“, рече Мицоска.

Пред стартот на работата сите градинки во Гостивар беа темелно дезинфицирани. Согласно препораките, додека има поволни временски услови, повеќето од едукативните активности и игрите ќе се одвиваат во дворовите, на отворено. Во градинките поставени се информативни материјали за мерките на заштита од коронавирус, со содржини и илустрации прилагодени за детска возраст. Воспитно-образовните тимови новите правила и состојби на дечињата ќе им ги објаснуваат преку игри, песни и приказни.

Градинките ќе се водат по мотото  – “Играме, учиме и растеме на дистанца.”