Грипот „царува“ – Гостивар меѓу градовите со најмногу заразени во новата година

Во текот на првата недела од 2024 година (од 1 до 7 јануари), во Македонија се пријавени 1.025  случаи на грип, што е 2,5 пати повеќе во споредба со претходната недела. Во извештајот на Институтот за јавно здравје се наведува дека во однос на возраста, 544 лица се на возраст од 15-64 години, 233 кај деца на возраст од 5-14 години, 185 кај деца на возраст од 0-4 години и 63 се лица на возраст над 65 години.

Најмногу заболени се пријавени во Скопје – 269, Дебар – 188, Гостивар – 114, Штип – 107, Битола – 104, а во останатите, бројот на пријавени е помал од 100.

Амбулантите на матичните лекари, инфективното и педијатриското одделение во Гостивар изминатиот период се полни со пациенти, кои најчесто се со симптоми на силна кашлица, малаксаност, растечен нос, висока температура како и болки по телото. Според кажувањата на лекарите во најголемиот случај се работи за горнореспираторни инфекции. Оние кај кои се јавуваат компликации како бронхо-пневмонија или пневмонија се задржуваат на болничко лекување, додека останатите добиваат терапија за лекување во домашни услови.