Истражување: Престој во природа ја зголемува креативноста за 50%

Природата нѐ одмара, ги зголемува нашиот имунолошки систем и креативноста. Секоја прошетка во природа ни открива нешто ново, ни предизвикува чудење и восхит, а го разбудува и детето во нас. Едноставно кажано, излет во природа е нешто најдобро што можеме да направиме за себе.

Според студијата објавена во списанието “PLoS ONE“, само четири дена во природа, подалеку од електронските уреди, може да ја зголеми креативноста за дури 50%.

Од 56 личности (со просечна возраст од 28 години) вклучени во студијата, 24 направиле тестови за креативност во првото утро од планинарскиот излет во Колорадо, Маин, Вашингтон и Аљаска. Останатите учесници направиле тест четвртиот ден од излетот и на тестовите покажале подобар резултат за 50% повеќе наспроти првата група.

Авторите на студијата се согласни дека не се сигурни дали креативноста ја зголемува само отфрлањето на електронските уреди, или само престојот во природа, или пак и двете. Уште еден важен фактор во ова истражување е тој дека зелената боја, која во природата ја има во изобилство, е често поврзана со креативноста. Во научни истражувања, како што е студијата објавена во списанието “Personality and Social Psychology Bulletin“, на учесниците на кои им е прикажана зелената боја дале поимагинарни одговори од оние на кои им е прикажана белата боја.

Покрај овие истражувања, во Јапонија, неодамна, се спроведени неколку истражувања во кои стручњаците утврдиле дека прошетка во природа го зголемува имунолошкиот систем за околу 50%.