Изложба на делата создадени на ликовната колонија во Гостивар

Во Центарот за култура АСНОМ во Гостивар вчеравечер беше отворена изложба на делата кои ги создадоа уметниците учесници на годинешното издание на Меѓународната ликовна колонија. Манифестацијата по 13 пат ја организира Здружението на ликовни уметници „Драудакум“

„Уметноста е нишка која ги спојува сите. Нашата колонија ја има токму таа улога, спојува уметници од целиот свет и ние сме горди на тоа“, рече претседателот на Здружението, Решат Амети.

Присутните уметници и гости ги поздрави и министерот за култура на Република Македонија, Асаф Адеми кој на организаторите им посака уште многу успешни изданија на колонијата и во иднина.

Кусо обраќање имаше и заменикот на градоначалникот Бесим Мемеди, кој во име на општината додели благодарници на членовите на Здружението.

Годинава на ликовната колонија во Гостивар учествуваа четириесетина уметници од Македонија, како и од повеќе странски земји: Украина, Косово, Албанија, Бугарија, САД, Турција. Специјален гостин беше Омер Калеши, истакнат сликар по потекло од кичевско, кој живее и твори во Франција.

Колонијата се организира со поддршка на Министерството за култура и општина Гостивар.