Југословенски колач: Десерт што се враќа во мода

Рецептот за овој десерт беше доста популарен меѓу домаќинките во времето на Југославија. Според кажувањата, настанал во седумдесеттите години, а сите го засакале затоа што се прави прилично лесно и содржи едноставни достапни состојки. Ако ѕирнете во старите тетратки со рецепти на вашите мајки и баби, сигурно некаде ќе го сретнете. Едно е сигурно, превкусен е, се топи во уста и се враќа во мода.

Состојки за кора:

4 јајца

100 грама шеќер

200 грама брашно

100 милилитри масло

100 милилитри вода

прашок за пециво

Состојки за фил:

1 литар вода

1 килограм јаболка

2 кесички пудинг од ванила

100 грама шеќер

За декорирање: 500 милилитри слатка павлака или шлаг

Подготовка:

Изматете ги белките и 50 гр. шеќер во цврст шлаг. Измешајте ги жолчките со масло, вода, брашно и прашок за печиво. Откако добро ќе се измешаат, соединете ги двете смеси со лажица. Убаво измешани, ставете ги во плех. Загрејте ја рерната на 180 степени и печете ја кората околу 20 минути.

Во 900 милилитри вода додајте го останатиот шеќер и оставете да зоврие, па додадете ги ситно сецканите јаболка и варете дваесеттина минути.

Измешајте го остатокот од водата со 2 пудинга и додајте ги во водата со јаболката, па продолжете да загревате околу 3 минути и врелата смеса истурете ја врз корите.

Кога ќе се излади колачот, изматете слатка павлака или шлаг и премачкајте го. Оставете го колачот да отстои, пред да го послужите.