Како и зошто тортата стана симбол на родендените?

Тортата несомнено е најголемиот симбол на роденденското прославување. Без разлика дали роденден слави дете или возрасен човек, сите најголемо внимание обрнуваме на тортата, која според редот на нештата доаѓа на крајот од роденденската забава. Неизбежно е и дувањето свеќи и замислување желба.

Сте размислувале ли некогаш од кога и од каде потекнува ваквата традиција, која денес се практикува во сите делови на светот?

Роденденските забави се традиција која датира од древниот Египет, а Римјаните први ги вовеле колачите и тортите како значаен дел од славењето. Старите Грци имале обичај да прават торта во облик на круг, која ја симболизирала месечината.

Свеќичките први почнале да се користат во Германија во доцниот 18-ти век. Богатиот гроф Николај Лудвиг за неговата гала роденденска забава, ги изненадил гостите со голема округла торта со свеќички за кои рекол дека ја симболизираат светлината на животот. Половина век после него, принцот Август за својот роденден имал огромна роденденска торта на која биле наредени 52 свеќи, колку што имал години. Се верува дека од тогаш почнала приказната за дувањето на свеќи врз роденденската торта. Некои народи денес одат и до таму, што ставаат повеќе свеќи отколку што славеникот има години, со верување дека на тој начин ќе му се продолжи животот.

За разлика од останатиот свет, Кинезите на пример, тортата како симбол за роденден ја прифатиле неодамна. Кај нив обичајот е славеникот за роденден да изеде кнедла на долговечноста.

Постои верување дека кога се дуваат свеќите и се замислува желба (која не смее да се каже гласно) се испраќа порака до Бога, како еден вид на молитва која тој ќе ја слушне и услиши.