Катастар Гостивар: Бесплатен упис на сопственост за парцели во 15-тина села

Сопственици на имот во 15-тина населени места, кои се под надлежност на Одделението за катастар во Гостивар, годинава имаат можност за бесплатен упис на правото на сопственост и добивање на имотен лист. Се работи за села каде вкупниот опфат на запишани имоти е под 20% и тие влегуваат во годишната Програма на Владата за 2017-та година за ажурирање податоци по службена должност. Акцијата за бесплатно запишување на правото на сопственост во катастарот, оваа година се спроведува во следните населени места:  Долно Јеловце, Тануше, Нистрово, Бибај, Рибница, Грекај и Нивишта, Сенце, Жужње, Богдево, Кракорница, Бродец, Горна Волковија, Куново и Добри дол.

Граѓаните и правните лица кои поседуваат имот во катастарските општини опфатени со програмата треба да поднесат барање до Одделението за катастар во Гостивар и да ја приложат целокупната документација со која располагаат: пресуди, договори, акти на државни органи, наследни решенија, поседовни листови и друго.

Минатата година, во Македонија со Програмата за бесплатно запишување на правата на сопственост, имотен лист добиле околу 4.000 граѓани и правни лица.