Казнети возачи во Гостивар оти не пропуштале пешаци

Полициски службеници на СВР Тетово вчера (18 јули) од 10 до 14 часот спровеле акциска контрола на возачи и нивниот однос кон пешаците, дали и колку им даваат предност, односно ги пропуштаат. При контролата биле откриени и санкционирани вкупно 18 прекршоци (Тетово-14 и Гостивар-4). Најголемиот број од прекршоците се однесувале на непропуштање на обележани пешачки премини, а санкционирани се и 4 други видови сообраќајни прекршоци, извести полицијата.

„На возачите-прекршители изготвени им се законски предвидените поднесоци и тие ќе се соочат со парични глоби кои се движат од 200 до 250 евра во денарска противвредност, а оние кои го загрозиле поминувањето на пешаците и со мерка времено одземање на возачките дозволи од три месеци до една година.“, стои во соопштението од СВР Тетово.

Оттаму ги потсетуваат возачите секогаш да ги им даваат предност на пешаците на премини и воопшто, а пешаците, пак, да бидат крајно внимателни кога и каде ги преминуваат улиците и како се движат по улици на кои нема обликувани тротоари.