Ќе се ограничат јавните собири? – Владата ќе одлучува денес

Министерот за здравство Венко Филипче утрово информираше дека доставил предлог за ограничување на масовни јавни собири, како мерка за превенција од ширење на коронавирусот. Предлогот ќе се најде на разгледување на вонредна седница на Владата, што ќе се одржи денес.

„Доцна синоќа имавме состанок со Комисијата за заразни болести и се донесе препорака да се ограничат масовни јавни собири, согласно законот за спречување заразни болести. За овој предлог ќе се дискутира на седница на Владата денес. Ограничувањето е пред се` со фокус на карневалите во Струмица и Прилеп.“, изјави Филипче.

Министерот информираше дека пациентката со коронавирус е во стабилна состојба, нема знаци на компликации, и проценка на лекарите е дека влегува во фаза на опоравување.

Денес е земен материјал за испитување од уште едно лице, патник кој на 22 февруари дошло од Италија, има блага покачена температура, а резултатите се очекуваат во текот на денот.