КК Гостивар ги запали моторите

Тренерот Марјан Србиновски денеска ја изврши првата прозивка на КК Гостивар. „Бело-сините“ и официјално ги започнаа подготовките за новата прволигашка сезона. Подготовките за престојната сезона ќе ги одработат во Гостивар, веќе се и закажани неколку пријателски натпревари.

– Имавме неколку понуди и предлози каде да ги одработиме подготовките, Маврово, Бугарија, Србија, но во консултација со Србиновски и останатите тренери заклучивме дека максимумот би го извадиле во Гостивар. Можно е да направиме мини балканска турнеја каде би одиграле неколку меѓународни пријателски натпревари – вели тим-менаџерот, Саити.

Помеѓу играчите на првиот тренинг можеа да се видат веќе познати имиња од минатата сезона кои покрај понудите да преминат во други клубови во странство одлучија да останат во Гостивар.

– Причината поради која го продолжив договорот е таа што минатата сезона беше одлична. За мене, за целиот тим, за градот, за навивачите. Се создаде позитивна атмосфера од тренерот, стручниот штаб, помеѓу нас играчите кои го почитувавме договореното. Атмосферата во салата е феноменална, благодарение на нашите навивачи, се надевам ќе не поддржат и оваа сезона. Во оваа прилика сакам да ги поздравам и да им порачам дека тие се нашиот шести играч, ни изјави хрватот Јурај Сегариќ.

– Имавме добра сезона минатата година. Не се двоумев многу кога пристигна понудата, клубот функционира одлично, а секогаш полната сала и верната пубулика не ти дозволуваат да размислуваш многу за други понуди. Се надевам оваа сезона ќе биде уште подобра, вели Ивица Димчевски.

Без доцнење на првиот тренинг се појавија последните појачувања, американците Канти и Фурстингер, кои ги разгледуваа и се запознаа со условите во кои ќе работат.

На тенерот Марјан Србиновски во претстојната сезона на располагање ќе му бидат играчите: Јурај Сегариќ, Ренато Димитриевски, Роберт Димитриевски, Ивица Димчевски, Димче Тасовски, Јетмир Зеќири, Карим Канти, Џо Фурстингер, Мартин Шалев, Златко Јовицоски, Антонио Симуновски, Марјан Ѓорѓески, Борис Дуковски, Ќипре Серафимоски, Тауланд Ибраими и Никола Заревски.

На клупата како и минатата година ќе му помагаат Душко Јаковчески и Никола Димитриески, како и кондициониот тренер Сашо Пецев.

За амбициите во сезоната 2018/2019 гостиварци не се расфрлаат со коментари, мудро молчат и ги чекаат први сигнли од стручниот штаб. Но, според сработеното во летниот период, ентузијазмот, појачување на редовите во сите структури во клубот, играчкиот кадар, искуството, публиката. Со сигурност може да кажеме гостиварци нишанат некаде на врвот.

На изненадување на сите на првиот тренинг се појави и Перо Антиќ. Акционерот во КК Гостивар и сеуште активен играч кој нема одлучено каде ќе ја продолжи кариерата. Од прикажаното на тренингот може да заклучиме дека обрачите во спортската сала Младост одлично му лежат.