КК Гостивар рутински против ФМП Академија 87-79

Заврши натпреварот од 16-тото коло во кое кошаркарите на Гостивар пред околу 300 гледачи во Спортската сала Младост убедливо славеа против екипата на Навико ФМП Академија со 87-79.

Неизвесни беа само воведните минути од натпреварот, гостите беа рамноправен противник во првите 7 минути кога имаа (15-15), до крајот на четвртината домаќините успеаа да обезбедат резултатска предност добивајќи го периодот (26-19). И вторите 10 минути им припаднаа на гостиварци, за на паузата заминат со +9 поени позитива, при резултат 47-38.

Во вториот дел „бело-сините“ продолжија да го полнат обрачот на гостите, избраниците на Тони Симиќ нема одбрана против расположениот Гостивар, третиот период беше најефикасен на натпреварот кој им припадна на домаќините (26-21). Во последните 10 минути ФМП Академија тргна на се или ништо, по што успеаа да направат серија од 0-9 и внесат доза на неизвесност во завршницата. Гостиварци 6 минути беа без постигнат поен, но успеаа да го издржат налетот на гостите и во последните минути само потврдат победата, за конечни 87-79.

Виктор Ефремовски ги предводеше домаќините со 25 поени, Вучковиќ постигна 22, Корсантиа 17 и Жигон 16 поени. Најефикасен на натпреварот беше Смит од Академија ФМП со 29 поени.