Колку црниот леб што се продава е навистина здрав и природен?

Оние кои сакаат да имаат балансирана исхраната и се грижат за своето здравје се почесто одбираат црн наспроти бел леб. Црниот леб има помалку калории, диететски влакна, растворливи шеќери, ја држи ситоста подолго време, полесен е за дигестивниот систем…Накратко, има многу предности пред белиот леб.

Прашањето кое се поставува е колку црниот леб што се наоѓа во продажба е навистина здрав.

Како да го препознаете?

Вистинскиот црн леб треба да биде направен од цело пченично или `ржано зрно. Темната боја на лебот би требало да потекнува од брашно настанато од мелење на целокупно зрно, таканаречено интегрално.

Самата структура на лебот е компактна и кога се сече, парчињата не треба да имаат дупчиња, шуплини туку да се набиени.

Црниот леб содржи многу повеќе влажност од белиот, па затоа е и потежок.

За да го продадат како црн, многу пекари користат различни трикови, односно го обојуваат со вештачки бои, кафе, па дури се користи и црно вино. На едноставен начин можете да проверите дали црниот леб што сте го купиле е природен или обоен. Парче од средината на лебот потопете ја во чаша вода. Ако водата се обои, тогаш тоа не е вистински црн леб и за него се користени вештачки начини за да ја добие бојата.