Комбистите трупат патници и не мислат на безбедноста

Комбињата за јавен превоз и оние во кои се возат учениците, секојдневно се преполнуваат со патници, повеќе од дозволеното. Превозниците на ваков начин гледаат да заштедат, без да помислат на последиците и безбедноста на патниците.

Вчера, гостиварската сообраќајна полиција извршила контрола на јавните превозници. Вкупно биле опфатени 23 возила. Дури девет комбиња превезувале повеќе патници од дозволеното, односно имале претовар. Кај четири биле откриени други видови на прекршоци.

Сите се соодветно санкционирани, соопштуваат од полицијата со најава дека ваквите контролни активности ќе продолжат во наредниот период и се еден од главните сообраќајно-безбедносни приоритети за годинава.

Казната за претовар, кога станува збор за фирма е највисока за автобусите и тоа 2.000 евра, додека за комбињата е 1.400 евра. Доколку физичко лица во својот автомобил вози повеќе од дозволениот максимум патници, ќе плати казна од 45 евра.