„Комуналец“ Гостивар набави 50 нови контејнери и три специјални возила

На неколку локации во Гостивар, определени како критични точки, денес ќе се распоредуваат дополнителни контејнери за ѓубре кои ги набави јавното претпријатие Комуналец. Обезбедени се вкупно 50 контејнери и според објаснувањето на надлежните ќе се постават во реонот близу автобуската станица, во населбата Малеарди, покрај Кејот и во централното градско подрачје.

„Набавивме 50 нови контејнери со средства од буџетот на претпријатието и од општина Гостивар. Денес ќе ги распределиме на тие локации за кои увидовме дека има најголема потреба. Апелираме до граѓаните ѓубрето да го фрлаат во контејнерите, не наоколу, за да имаме чист град.“, кажа директорот на претпријатието Фатон Билали додавајќи дека во централното подрачје екипите ги празнат контејнерите по три пати во денот.

Исто така со сопствени финансии и пари од локалната самоуправа, „Комуналец“ набави и два нови камиони за собирање на отпад. Преку грант пак, обезбеди специјално возило за метење на улиците.