Крпен живот! 51.500 денари месечно за основни трошоци на едно семејство

Сојузот на синдикати на Македонија ја изработи новата минималната синдикална кошница за месец октомври која достигна до 51 514 денари и е зголемена за 1 290 денари од претходниот месец септември. Од почетокот на годината пак, од јануари порасна за 15 703 денари. Во споредба со истиот месец октомври 2021-ва зголемена е за 16.940 ден. „Од месец во месец, драстично се зголемуваат трошоците за живот на едно четиричлено семејно домакинство, а платите не го следат истиот раст. Истото го покажува и самата пресметка на синдикалната минимална кошница што ССМ ја пресметува секој месец. Овој процент на инфлацијата за месец септември е нов аларм за синдикатите, затоа што платите не се зголемуваат но цените и натаму растат и покрај маржите. Затоа ССМ со право бара зголемување на платите на сите вработени како во јавниот така и во приватниот сектор. Како најголем и репрезентативен синдикат загрижени сме, и сметаме дека работниците и граѓаните ќе бидат доведени до тешка економска социјална положба, со зголемувањето на инфлацијата во државата.“, алармираат од Сојузот на синдикати. Од таму посочуваат дека растот на инфлацијата која од месец за месец е се поголема за месец октомври рекордно достигна до 19,8% што влијае врз намалувањето на куповната моќ на работниците и доведува до осиромашување на целокупното население.