Локални спелеолози ќе се обучуваат за истражување на пештерата во Ѓоновица

Шест локални спелеолози ќе поминат низ обука за проучување на пештерата Убавица во гостиварска Ѓоновица. Активноста е дел од проектот “Зајакнување на локалните актери за истражување и конзервација на природното наследство на пештерата Убавица“, што го спроведува Спелеолошкиот клуб Кораби, во соработка со општина Гостивар. За таа намена изминатиот период беше објавен оглас за пријавување на заинтересирани, кој завршува денес, 6 август.

„Тематската обука има за цел да ги подобри вештините на локалните спелеолози, а воедно проектот има за цел да ги зајакне капацитетите на локалното население, локалните институции и здруженија на граѓани за заштита на природното наследство, односно заштита на споменикот на природата – Пештерата Убавица во село Ѓоновица“, наведуваат од локалната самоуправа.

Обуката ќе опфати теоретски и практичен дел. Локалните спелеолози ќе учат за геологијата на пештерите, природниот тек на подземните води, животот во пештерите, ќе совладуваат спелеолошки истражувачки техники како и прва помош и спасување во пештери.

Оние кои успешно ќе ја завршат обуката ќе добијат меѓународен Сертификат за завршена обука по спелеологија.

Проектот е дел од поголема програма за „Подобрување на управувањето со заштитените подрачја“, финансирана од Европската Унија.