Потврден уште еден случај на морбили во Гостивар

По појавата на првите заболени од мали сипаници на гостиварското подрачје од пред десетина дена, потврден е уште еден случај. Се работи за пациент на возраст од 39 години, за кој епидемиолошкото одделение добило лабораториски позитивен резултат за морбили. „Пациентот поминува со лесна клиничка слика и е на домашно лекување.“, велат од одделението.

Лабораториски резултати се чекаат за уште едно лице, кај кое постои сомнеж дека е заболено од мали сипаници.

Први со морбили во Гостивар се заразија две жени на возраст од 39 и 42 години, кои беа хоспитализирани на Инфективната клиника во Скопје. Пријава до епидемиолошкото одделение стигнала и за едно 13 месечно дете, за кое по проверка се утврдило дека по прегледот во Скопје, веќе се наоѓа во странска земја.

Епидемија на мали сипаници е прогласена во Скопје. Здравствените власти донесоа одлука да се одложат редовните термини за преглед во Институтот за белодробни заболувања Козле и на Клиниката за детски болести за да се спречи ширење на болеста. Секојдневно се упатуваат апели до родителите да ги вакцинираат децата со МРП како единствен ефикасен начин на заштита.

Од почетокот на епидемијата во Скопје, заклучно со 15 февруари, регистрирани се вкупно 259 случаи на мали сипаници.