Мултиетнички концерт на отворено во Гостивар

Во летниот Амфитеатар, покрај Кејот на Вардар во Гостивар вчеравечер се одржа мултиетнички концерт на кој учествуваа музичари од различни националности. Преку музиката тие испратија порака за негување на мултикултурата и соживотот, особено меѓу младата популација.

„Со вакви настани воспоставуваме взаемна почит, соработка и разбирање меѓу нас. Ги промовираме и афирмираме сопствените култури и градиме доверба“, беше речено на почетокот од концертот.

Настанот се одржа како дел од програмата на „Денови на иселениците“, што ги организира гостиварската локална самоуправа.

„Имаме различни активности, културни, спортски, забавни со кои се трудиме да им го направиме престојот на иселениците во родниот крај што попријатен“, рече Аслиан Снопче, раководител на општинскиот Сектор за образование и култура.

Мултиетничкиот концерт во Летниот Амфитеатар се организираше во соработка со Здружението Дрита АГВ, со поддршка на Министерството за култура.