Музичарите излегуваат на протест: Да се дозволи музика во живо и во кафулињата

Револтирани што властите дозволија музика во живо само на свадби, а не и на обични забави и мали настани, музичарите ќе протестираат. Од Здружението за унапредување на правата на музичарите „Музика сега“ најавија дека протестот ќе се одржи во петок во Скопје.

„И покрај сите наши напори, не успеавме да ја рабереме логиката на последната официјална објава по одлуката на владата за олабавување на мерките. Зошто свадбите и музичарите кои настапуваат по свадби би биле привилегирани сега во однос на другите? Каде се протоколите за мали настани (кафулиња, ресторани, ноќни клубови, барови, кафани и други угостителски објекти) кои ви ги предадовме изминатото лето? До кога ќе трае оваа дискриминација, бидејќи за тоа се работи, за дискриминација?! Со оваа последна одлука од комисијата за заштита од заразни болести овие половични мерки ќе се создаде хаос во работењето во новото секојдневие и неминовно ќе резултира со секојдневно лажно организирање свадби и прослави во сите угостителски објекти. Затоа овој пат се обраќаме до Владата, која ги изгласа предлог мерките предложени од Комисијата за заразни болести и апелираме и бараме, концизно и јасно да се укине мерката од Службен весник бр.240 од 05.10.2020 – Прилог број 7 и 8 точките број 13 и 15 без дискриминација на било кој сегмент од нашиот колегиум и конечно после 15 месеци да може да отпочнеме со работа сите, ама во буквална смисла на зборот сите музичари. Доколку нашите молби и барања не бидат ислушани, овој петок 04.06.2021 година најавуваме протест“, се вели во соопштението на Здружението.