Над 40 казни – Возачите како на трка по автопатот Гостивар-Скопје

Секторот за внатрешни работи Тетово, вчера во периодот од 12 до 18 часот, спроведе акциска контрола за брзина со која се движат возилата надвор од населено место, односно на автопатот Гостивар-Тетово-Скопје и магистралниот пат Гостивар-Кичево.

Како што соопшти полицијата, во акциската контрола биле откриени вкупно 43 прекршоци, од кои 10 на тетовското и 33 на гостиварското подрачје. Најголемиот број од пречекорувањата на дозволената брзина биле за 30 до 50 километри на час, а регистрирани се и десетина пречекорувања за 50 до 70 километри на час.

На прекршителите изготвени им се 35 мандатни и осум прекршочни платни налози.

СВР информира дека акциската контрола е во рамките на планираните активности за поголема безбедност во сообраќајот на полошкото подрачје.