НАЈЧИТАНИ ВО 2019-та: Беше судија и адвокат во Гостивар, стана министер, од денес е прв човек на Врховен суд

На опашката сме од оваа 2019-та година и редно е да се потсетиме на најинтересните и најчитаните текстови на Gostivarpress.mk од јануари, па се до денеска. Порталот Gostivarpress.mk во 2019 објави околу 4.500 вести, од кои 90% се авторски на редакцијата и имаше повеќе од 4.050.000 посети.

Време е на празнувања и почитувајќи го тој дух и за да придонесеме за поубава празнична атмосфера, ќе ги заобиколиме вестите од црната хроника. Денес и утре, целосно ќе ги реобјавиме најчитаните прилози, да се потсетиме што беше тоа што најмногу го привлече вашето внимание…

Беше судија и адвокат во Гостивар, стана министер, од денес е прв човек на Врховен суд

Објавен на: Септември 10, 2019 @ 17:02

Судијата Фаик Арслани денес беше избран за в.д претседател на Врховниот суд на Македонија. Судскиот совет го постави Арслани на раководната позиција, откако го разреши Јово Вангеловски, поради нестручно и несовесно вршење на функцијата.

Фаик Арслани е роден во 1959 година во селото Добридол. Студии завршил на Правниот факултет во Нови Сад, во рамки на тогашна Југославија.

Во неговата биографија е наведено дека од 1984 до 1988 бил вработен во ОЈО – Гостивар, по што бил претседател на Општинскиот суд за прекршоци – Гостивар.

Од 1996 година до 2001 година бил судија при Основниот суд Гостивар. Во следните две години е назначен за министер за локална самоуправа, а потоа до 2008 година работел како адвокат во Гостивар. Од 2008 година Арслани е член на Советот на јавните обвинители на РМ избран со одлука на Собранието. Од септември, две години подоцна работи како судија на Врховниот суд на Македонија.

Во 2009 година на правниот факултет во Приштина, се стекнал со диплома за постдипломски судии и титула м-р по правни –управни науки.