Намалени цените за летните бавчи на угостителските објекти во Гостивар

Угостителите на подрачјето на гостиварската општина ќе плаќаат поевтин надоместок за летните тераси на објектите. Од локалната самоуправа известија дека одлуката е на иницијатива на градоначалникот Арбен Таравари, во склоп на мерките за управување со кризата создадена од пандемијата со Ковид-19.

„Додека во претходните години, во нормални услови, се пресметуваа 180 дена за користење на тераси, оваа година ќе се пресметаат само 120 дена и тоа за 30% пониска цена, што всушност значи дека угостителите годинава ќе плаќаат околу 50% пониска комунална такса за оваа намена. Со оваа олеснителна мерка, градоначалникот Таравари има за цел да им помогне на угостителите полесно да се справат со кризата што се појави од пандемијата.“, се наведува во општинското соопштение.

Претходно Владата донесе Уредба за комуналните такси за време на вонредна состојба, според која: „која пресметувањето и наплатувањето на комуналната такса за користење на просторот пред деловни простории за вршење на дејност од м2 дневно, се изменува, и наместо истата да се плаќа од 5 до 15 денари за м2 дневно, се предлага да се плаќа од 1 до 15 денари за м2 дневно за периодот на времетрање на вонредната состојба, а доколку така одлучат  општините, кои ја наплаќаат оваа јавна давачка, можат да донесат одлука и да не ја наплатат јавната давачка за користење на просторот пред деловни простории.“