„Не можеме да врземе крај со крај“ – Втор протест во Гостивар против поскапување на струјата

Попладнево во Гостивар, пред  објектот на ЕВН се одржа протест против зголемувањето на цената на електричната енергија. Ова е втор пат како граѓани на Гостивар на ваков начин го искажуваат својот револт од последната одлука на регулаторната комисија за поскапување на струјата.

„Ова се манипулации и лаги на Владата, го лажат народот, само за да седнат во фотелја. Кога ќе седнат во фотелја, ништо не мислат за народот. Не можеме да излеземе на крај со плаќањето на сметките, земам 200 евра пензија, а 10 луѓе сме дома со две мали деца. Не стасуваат парите ни за леб и вода, а не пак струја да платиме“, рече еден од учесниците на протестот во Гостивар.

Протестот го поддржаа градоначалникот на Гостивар, Арбен Таравари и пратеникот од редовите на Алијанса за Албанците од Гостивар, Халил Снопче.

„Во време на пандемија државата треба да ги помага граѓаните, а само кај нас се случува парадоксална ситуација државата да ја поскапи струјата, и тоа не е во ред. Затоа го поддржуваме овој протест и така ќе реагираме секогаш кога системот ќе биде против граѓаните, ние да бидеме до нив и за нив“, изјави Таравари.

Снопче нагласи дека протестот е начин да се изврши еден вид притисок врз Регулаторната комисија да ја повлече одлуката за поскапување на цената на електричната енергија. „Во целиот свет, во услови на оваа глобална криза како последица на коронавирусот има олеснителни околности за граѓаните и не е нормална работа да се поскапува струјата. Па и моментот, после избори, пред да се формира Владата. Јас како пратеник на народот од овој крај ја поддржувам иницијативата против поскапувањето и не само тоа, туку и цената на струјата треба уште повеќе да се намали.“, рече пратеникот.

Гостивар е еден од неколкуте градови во земјава кадешто се организираат протести против зголемувањето на цената на елктричната енергија од 7,4%.