Нешковска: Општина Гостивар да има канцеларија и службеник за млади

Во локалната самоуправа на Гостивар да се отвори канцеларија за млади со назначен службеник за млади, кои ќе бидат ставени во функција на потребите и интересите на младата популација. Ова барање на денешната седница на Советот на Општина Гостивар повторно го изложи советничката Ема Нешковска од СДСМ.

„Сакам повторно да побарам од општината да назначи службеник за млади и да се отвори канцеларија за млади. Тој службеник треба да раководи со Младинскиот совет и да ги координираа и следи прашањата во интерес на младите. Советот на малди треба да биде прв сервис кадешто младите ќе ги искажат своите интереси и проблеми“, рече од говорницата Нешковска, која и пред една година го истакна истото барање.

И од советничката група на ДУИ имаа реакција за тоа дека не функционира Локален Младински совет, посочувајќи дека општинското раководство не обрнувало доволно внимание на ова тело.

Дискусијата околу младите се отвори откако беше усвоена одлука за измена на статутот на Општина Гостивар која  опфаќа усогласување со Законот за младинско учество и младински политики.