Низ улиците и патиштата во гостиварско се вози како по тркачки патеки

Нема дисциплина и не се почитуваат сообраќајните правила и прописи. Низ улиците и патиштата на подрачјето на Гостивар се вози како по тркачи патеки. Последните засилени сообраќајно-контролни активности за брзина на движење, кои ги спроведе полицијата го потврдија тоа. Контролите биле извршени во периодот од 15 до 18 овој месец.

Според информациите од Секторот за внатрешни работи во гостиварскиот регион биле откриени 36 прекршоци. Акции во исто време се спроведувале и во тетовско, каде биле фатени 64 возачи кои возеле пребрзо. Сите кои полицијата ги „уловила“ добиле казни.

Пречекорувањето на брзината се санкционира со парични казни или негативни бодови. Висината на паричната казна е од 10 до 400 евра, а впишување на негативни бодови оди од 10 до 65. Колкава казна ќе се одреди, зависи од тоа колкаво било пречекорувањето и дали се случило во населено место или на отворен пат.

На јавен пат во населено место, возачот не смее со возилото да се движи со брзина поголема од 50 километри/час, односно со брзина поголема од брзината дозволена со поставениот сообраќаен знак за целото населено место или за негов дел.

На јавен пат надвор од населено место, дозволената брзина се движи од 90 до 130 километри на час.