Новиот ковид бран во Гостивар ги погоди и училиштата

Од новиот бран на коронавирус не е поштеден ни просветниот кадар. Периодов со влошувањето на состојбата со ширење на вирусот на гостиварското подрачје, се зголемува и бројката на заразени меѓу вработените во училиштата.

Според информациите од општинскиот сектор за образование, над 20 просветни работници од училиштата на територијата на Општина Гостивар се позитивни на корона. Во оваа бројка спаѓаат и наставниците што држат настава со физичко присуство и оние кои работат онлајн.

„Како што растат бројките на заразени во градот и околината, се менува состојбата и во училиштата. Денес добив информација дека во училиштето „Лирија“ во Вруток позитивни се три наставници од македонската смена и има барање целото училиште наставата да ја одвива онлајн. И во другите училишта имаме по два-три случаи на заразени наставници. Ја следиме состојбата, се надеваме дека нема да се влошува и дека ќе може да продолжиме со наставата како до сега, со физичко присуство на децата до трето одделение“, информираше Аслијан Снопче, раководител на општинскиот Сектор за образование.