Објавен е тендерот за чистење на снегот во зимската сезона во Гостивар

Локалната самоуправа на Гостивар започна со подготовките за зимско одржување на улиците и патиштата на територијата на општината, коишто се под нејзина надлежност. Деновиве е објавен тендерот преку кој ќе се одбере фирмата што ќе го чисти снегот и ќе обезбеди индустриска сол за посипување. Освен улиците и локалните патни правци, избраната компанија ќе треба да ги одржува и дворовите во училиштата во зимската сезона.
Од фирмата се бара да располага со специјални машини и возила како: багер гасеничар, катерпилар, камиони со плуг и слично, како и да има минимум седум вработени лица. Поради специфичноста на работата, механизацијата мора да биде опремена со светла и соодветна опрема за ноќно работење. Исто така, во текот на целата сезона, треба да обезбеди 2 дежурни тима со камиони, кои ќе бидат на располагање на општината 24 часа.
Тендерот трае до 25 октомври, кога ќе има јавно отворање на понудите.