Објавен тендер – Општина Гостивар се подготвува за прскање против комарци

Локалната самоуправа на Гостивар деновиве објави јавен оглас за избор на фирма што ќе изврши дезинсекција на територијата на општината.

Како што е наведено во тендерската документација, прскање против комарци треба да се изврши на четири локации: коритото на реката Вардар во атарот на село Равен со површина од 1,5 хектари, каналот за наводнување од Здуње до Малеарди и каналот во Фазанерија и двата со површина од 2,8 хектари, како и покрај река Јахорка во село Форино со површина од 1,5 хектари.

На овие локации се вршеа и претходните прскања, со оглед на тоа дека се детектирани како критични точки за размножување на ларви.

Во описот стои дека Вардар низ Равен има големи количини комунален отпад и од реката се шири непријатна миризба, каналот во Фазанерија е отворен и запуштен, во него се излеваат фекални води и смет, додека во делови од Јахорка има комунален и друг отпад.

Тендерот е определен како набавка од мала вредност, а како критериум за избор е наведена најниската понудена цена.

Лани дезинсекција на подрачјето на Гостивар се изврши во јули и август.