Од 2024 година телефоните нема да се продаваат со полнач во кутијата

Од 2024 година, производителите на паметни телефони би можеле да бидат принудени да престанат да дистрибуираат полначи со нивните уреди. Тоа е целта на предлог – законот што ќе наметне единствен стандард за полнење мали електронски уреди и ќе забрани продажба на полначи со мобилни телефони.

Оваа недела, Европската комисија најверојатно ќе претстави предлог – закон што предвидува воведување универзален полнач за електронски уреди, со што ќе се забрани продажба на полначи во пакет со уреди на територијата на Европската унија.

Овој потег има за цел да ја намали акумулацијата на електронски отпад, најмногу поврзана со производство на нови и отстранување стари неупотребливи уреди, телефони, таблети, слушалки, камери и звучници.

Како заеднички стандард за сите уреди, може да се предложи USB-C, кој веќе беше инсталиран во 2018 година во нешто помалку од една третина од сите паметни телефони продадени во земјите-членки на ЕУ.

Производителите на уреди се противат на таквите напори на Европската унија, кои траат повеќе од 10 години во различни форми. Најгласниот меѓу нив е Apple, кој заедно со својот iPhone и други уреди продава свој Lightning приклучок .

Европската комисија се надева дека, по јавна расправа и законодавна постапка, новиот закон ќе може да стапи на сила во 2024 година.