Одбележани 75 години од смртта на народниот херој од Гостивар Панче Попоски

Општинскиот одбор на Сојузот на борци-Гостивар одбележа 75 години од смртта на народниот херој, Панче Попоски, гостиварец којшто загинал во Дебар. Чествувањето се одржа токму во Дебар, пред бистата на Попоски, поставена во дебарскиот градски парк, покрај бистите на народните херои Ибе Паликуќа и Лиман Каба.
„Со нив, овде, во овој паметник ќе живее и споменот на бројните нивни другари што паднаа во борбите за Дебар и на другите боишта. Чувањето на нивниот спомен не е само цивилизациски долг, тоа пред се е потреба на сегашниве и идни генерации објективно да размислуваат за тоа време, да ги сочуваат неговите неспорни вредности, врз нив да создаваат нови, уште посилни и пообединувачки, да учат од грешките и на тоа време и времето по него, зошто попусти се историските поуки, ако се повторуваат истите грешки.“, истакна претседателот на одборот, Радислав Ѓиноски.
Панче Попоски е роден 1924 година во Гостивар. 1941 година станува член на СКОЈ, а во 1942 година член на КПЈ, секретар на партиска ќелија и инструктор. Во партизани заминал 1943 година. Станал младински, а подоцна партиски раководител на батаљонот. Загинал во 1944 година во борбата со германците на влезот на Дебар.

За народен херој е прогласен на 11-ти октомври 1953 година.