Оедо Ботаника – Пуст Остров претворен во прекрасна ботаничка градина

Брегот на Јужна Kореја го опкружуваат низа на помали острови, а меѓу нив посебно се истакнува островот Оедо Ботаника. Некогаш пуст, неплоден остров на кој можеле да се видат само камен и сува земја, а денес го краси прекрасна ботаничка градина која секојдневно ја посетуваат туристи од цел свет.

Сѐ започнало во 1969-та година кога Ли Чанг Хо. се сокрил на островот Оедо од големо невреме на југоисточниот брег на Јужна Кореа. Додека чекал невремето да се смири, Ли забележал потенцијал во карпестиот предел и истата година се доселил на островот со неговата сопруга Чои Хо Сук.

Најприн се обиделе да одгледуваат мандарини и прасиња, но сувата земја и камењата им правеле големи проблеми. Но, тоа не ги спречило да го прифатат предизвикот и да го претворат островот во прекрасен градинарски рај. Потоа ентузијазмот ги довел до тоа целиот остров да го пренаменат во ботаничка градина за што добиле дозвола во 1976-та година.

После скоро 30 години напорна работа, на островот сега растат секакви видови дрвја, цвеќиња, разни растенија, па дури и кактуси и некои ретки видови билки.

Уредените патеки и убаво и прецизно засадените билки, ствараат глетка како од бајките која покрај својот изглед, на туристите им нуди и единствен мирис кој настанува со мешање на ароми од неколку илјади видови растенија.