Огласите се отворени: И во Гостивар обуки за лични асистенти на лица со попреченост

Гостивар е еден од седумте градови во Македонија во кои годинава ќе започне да се спроведува Програмата за персонална асистенција на лица со попреченост.  Министерството за труд и социјална политика објави јавни повици за пријавување на заинтересирани граѓани и здруженија како даватели на услугата.

Невработени лица кои се евиденирани во Центарот за вработување во Гостивар може да се пријават за обука за персонални асистенти за инвалидни лица која ќе трае три месеци. За тоа време, тие ќе добиваат месечен надомест од 9.000 денари, по завршувањето на обуката, ќе полагаат завршен испит, а оние кои ќе положат ќе се стекнат со сертификат за личен асистент. Може да конкурираат граѓани на возраст од 18 до 64 години, со минимум завршено средно образование, работно способни и неосудувани. Пријавувањето трае до 5-ти април.

Даватели на услугата, лична асистенција може да бидат и здруженија кои се запишани во Регистарот на здруженија од областа на социјалната заштита. И за нив е отворен јавен повик, а може да аплицираат до крајот на оваа недела. Тие своите пријави ги доставуваат до Министерството за труд и социјална политика.

Програмата за персонална асистенција беше усвоена на 13 март годинава и има за цел да се обезбеди поддршка за независно и самостојно живеење на лицата со потешка и најтешка телесна попреченост и лица со целосно оштетен вид. Освен во Гостивар оваа година програмата ќе се спроведе и во Битола, Струга, Куманово, Неготино, Струмица и Градот Скопје