Огнен Анастасијески го извади крстот на Богојавление во Гостивар од водите на Вардар

Светиот крст на Водици-Богојавление годинава во Гостивар е во рацете на Огнен Анастисијески (17). Тој беше најсреќен меѓу момчињата кои учествуваа во вадењето на крстот положен во водите на Вардар, во рамки на одбележувањето на големиот христијански празник.

Како што е редот, кон среќникот беа упатени искрени честитки и желби, пред се‘ за здравје, бериќет и благосостојба од верниците кои дојдоа заедно да го чествуваат денот и беа дел од манифестацијата.

Според верувањата, оној кој ќе го фати крстот, ќе го следи среќа и благослов цела година. Фаќањето на крстот значи соединување на човекот со Христа, а се верува дека со положувањето на крстот, водите стануваат лековити.

Прославата на празникот во Гостивар започна утрово со света литургија во соборниот храм „Успение на Пресвета Богородица“ на градскиот плоштад. По богослужбата, литијата тргна од црквата и преку централното градско подрачје се движеше до малиот мост на Вардар, пеејќи ја песната „Во Јордање“. Таму беше извршен чинот на осветување на водите и положување на светиот крст во реката.

Gostivarpress.mk во текот на денот ќе објави репортажи од прославата.

Бог се јави-Навистина се јави!