ОЈО Гостивар бара притвор за мајката на детето врзано со ланци кое се задуши во пожар

Основното јавно обвинителство Гостивар донесе Наредба за спроведување истражна постапка против мајката на детето кое настрада во пожар вчера во Гостивар. Таа се сомничи дека сторило кривично дело – Повреда на семејни обврски, предвидено и казниво согласно член 203 став 2 во врска со став 1 од Кривичниот законик.

„Осомничената, во текот на 2021 година, со груба повреда на своите законски семејни обврски го малтретирала своето дете на возраст од 7 години, кое го врзувала со ланец и катанец за креветот. На 16 март, во станот во кој престојувало семејството избувнал пожар, a затоа што било врзано за креветот детето не успеало да го напушти домот и го загубило животот.“, информира обвинителството.

Јавниот обвинител до судија на претходна постапка од Основниот суд во Гостивар достави предлог за определување мерка притвор за 36-годишната осомничена. За наведеното кривично дело во Кривичниот законик е предвидена казна затвор од најмалку пет години.

Во меѓувреме, се уште се работи на утврдување на причините за пожарот.