Оскаровска ноќ: Ќе и донесе ли „Медена земја“ Оскар на Македонија?

Ноќеска, во театарот „Долби“ во Лос Анџелес ќе се одржи 92-то доделување на Оскар наградите во 24 категории, според гласањето на членовите на Американската филмска академија кое заврши во вторникот.

„Медена земја“ е на чекор до Оскар во категориите документарец и за филмско остварување од неанглиско говороно подрачје. Во историјата на американската академија, ова е прв пат документарен филм да е номиниран во две категории.

Петчлената авторска екипа – режисерите Тамара Котевска и Љубомир Стефанов, снимателите Фејми Даут и Самир Љума, продуцентот и монтажер Атанас Георгиев и протагонистката во филмот – пчеларката Атиџе Муратова веќе се во Холивуд и вечерва ќе бидат меѓу холивудската елита на свеченоста.

Во пресрет на оскаровската ноќ, угледниот британски весник „Гардијан“ предвидува дека „Медена земја“ ќе добие Оскар за најдобар документарен филм. Филмскиот критичар на весникот Питер Бредшоу, вели дека македонскиот филм ќе ги победи останатите конкуренти во оваа категорија.

Доделувањето на оскарите започнува во 2 часот по полноќ.