Основците од Гостивар се зближуваат преку спортот

Во салата на ОУ „Исмаил Ќемали“ во Гостивар денес се одржаа спортски активности во рамки на проектот на УСАИД   ,,Унапредување на социјалната кохезија“ во Република Македонија. Околу 90 ученици од прво до трето одделение од неколку гостиварски училишта заедно спортуваа, се дружеа и забавуваа.

„Целта на проектот е да ја зајакне меѓуетничката интеракција меѓу децата и младите од различни етнички заедници и да го унапреди меѓукултурното образование. Спортот нема граници и ги обединува децата, а освен тоа позитивно влијае и врз нивното психо-физичко здравје“, истакна Вилма Венковска Милчев, директор на организацијата Потрага по заедничка основа што го спроведува проектот.

Настанот се организираше со поддршка на општина Гостивар. Вакви активности за зближување на децата преку спортот се реализираат во петнаесетина градови во Македонија.