ОУ „Единство“ Гостивар со настан во чест на книгите и мултикултурализмот

Да има меѓусебна почит, другарување, разбирање и да се развиваат навики за негување на љубовта кон книгите и читањето. Вакви беа пораките кои денес ги испратија учениците од гостиварското основно училиште „Единство“ на настан организиран како Отворен ден за Граѓанско образование.

Основците ги пречекуваа наставниците и другите гости со голема книга која самите ја изработиле, а во која беа вметнати убави мисли и мотивирачки цитати за пишаниот збор. Исто така, на присутните им делеа и ливчиња со кратки инспиративни пораки.

„Ова е еден мултиетнички настан преку кој се поттикнува дружба, соработка меѓу учениците од различна националност и јазична припадност. Децата беа многу посветени и со големо внимание и задоволство работеа на подготовка на сите активности. Темата за читањето и книгите ја избраа заеднички.“, рекоа од училиштето.

Програмата за презентација беше исполнета со литературни творби од децата (на македонски, албански, турски и ромски јазик), видео презентации, драмска изведба и слично, сето тоа во духот на најголемото богатство за умот на човекот-книгата.

Во склоп на активностите се роди и библиотека со донирани книги на сите јазици, кои децата и наставниот кадар може да ги читаат кога и да посакаат.

Настанот беше организиран под менторство на наставничките Марина Апостолоска и Лумније Сулејмани Абдули.