ОУ „Единство“ новата учебна ја стартува со нов инвентар и обновена котлара

Основците од училиштето „Единство“ во Гостивар оваа учебна година седнуваат во нови клупи и столчиња. Набавени и поставени се 270 клупи и 540 столчиња. Освен тоа, извршена е и интервенција на старата котлара во системот за парно греење, со што ќе се овозможи поефикасно и поекономично затоплување на училниците во зима. Парите за овие инвестиции се обезбедени од општината и од Министерството за образование.

„Ги направивме сите подготовки за успешен почеток на учебната година. На првачињата, кои за прв пат седнуваат во училишните клупи и на сите ученици им посакувам многу успех, а упатувам благодарност и до сите наставници кои својата работа и обврски си ги вршат со голема љубов и задоволство“, рече директорот на училиштето, Мерсел Садику.

Градоначалникот Невзат Бејта својата честитка и порака по повод новата учебна година ги испрати токму од ова училиштео, кое го посети денес.

„На учениците им посакуваме многу здравје и успех. Ние како општина инвестираме во училиштата за нашите деца да имаат добри услови да се едуцираат, затоа што тие се иднината на нашиот град“, изјави Бејта.

Во централното училиште „Единство“ и неговите подрачни училишта настава посетуваат вкупно 1.340 деца.