Овој Велигден домот нека ви замириса на мека велигденска погача

Семејниот ручек за христијанскиот празник Велигден традиционално е богат, со неизбежно месо, салата со велигденски јајца и по некој друг специјалитет кој ја краси трпезата. Да ја надополните празничната атмосфера и домот да ви замириса убаво можете да подготвите и велигденска погача на следниот начин…

Состојки:

350 гр. брашно

30 гр. шеќер

1 лажичка сол

1 лажица масло

100 гр путер (половина за премачкување)

35 гр. сув квасец

200 мл млеко

2 јајца

Подготовка:

Во поголем сад измешајте 250 гр брашно, шеќер, сол и квасец. Во посебен сад загрејте ги млекото и путерот додека не се растопат и соединат, па додадете ги во смесата со брашното. Додадете 2 јајца и преостанатото брашно и сè добро измешајте. Извадете го тестото од садот и месете го додека не стане меко и еластично. Потоа премачкајте го со малку растопен путер, покријте го со кујнска крпа и оставете го на топло место да стаса еден час. Кога волуменот ќе се удвои, поделете го тестото на два еднакви дела и оставете ги да отстојат уште 10 минути. Потоа, секој дел развлечете го, поделете го на три ленти и направете плетенки.

Поврзете ги плетенките во круг, со четка одозгора ставете путер и по желба посипете со сусам. Покријте со топла кујнска крпа и оставете да отстои 45 минути.

Погачата печете ја во загреана рерна на 180°C околу 30 минути. Кога ќе биде готова за декорација можете во средината да ставите велигденско јајце.