Постапки против угостители и возач во Гостивар кои прекршиле антиковид прописи

Основното јавно обвинителство Гостивар поведе постапки против три физички и едно правно лице за кривично дело – Непостапување според здравствените прописи за време на епидемија од член 206 од Кривичниот законик.

Како што соопшти обвинителството еден од обвинетите, во својство на автопревозник, вработен како шофер на мини-автобус, не постапил според прописите со кои се определени мерки за спречување и сузбивање на заразна болест, па дозволил превоз на поголем број патници од дозволениот.

Вториот обвинет, сопственик на угостителски објект – пицерија, не го почитувал ограничувањето на работното време и послужувал гости спротивно на прописите за спречување на ширењето на коронавирусот.

За овие двајца обвинети, надлежниот јавен обвинител на Судот му достави предлози за издавање казнени налози со кои предложи парични казни од по 100 дневни глоби.

За третиот обвинет – управител и за правното лице – слаткарница од Гостивар, поднесен е Обвинителен предлог, бидејќи не ги почитувале здравствените прописи и послужувале гости надвор од дозволеното работно време.