Повеќе починати од новородени во Гостивар во третото тримесечје од 2020-та

Гостиварскиот регион во третото тримесечје од годинава бележи негативен природен прираст на населението, односно повеќе починати од новородени. Според податоците на Државниот завод за статистика, во јули, август, септември на подрачјето на Општина Гостивар се родиле 171 бебе, додека починале 225 лица. Истиот период биле склучени 179 бракови, а имало 36 разводи.

И останатите две општини во регионот се со негативен природен прираст. Во О.Врапчиште се регистрирани 70 новороденчиња, а 76 лица починале. Се формирале 76 нови брачни заедници, додека 7 парови се развеле.

Во Маврово-Ростуше се родиле 12 бебиња, починале 23 лица, бројот на склучени бракови е 22, а на разводи 2.

На државно ниво, според податоците на Државниот завод за статистика, бројот на живородените деца во третото тримесечје од 2020 година, во споредба со истиот период од претходната година, изнесува 5 141 и е намален за 5.2 %. Бројот на умрените бележи зголемување од 15.3 % во споредба со истото тримесечје од 2019 година и изнесува 5 419 лицa, а од нив 23 се умрени доенчиња.

Природниот прираст во земјава е негативен, -278 лица,  што значи дека за толку лица бројот на живородените деца е помал од бројот на умрените лица.

Бројот на склучените бракови во ова тримесечје од годината е намален за 12.9 % во споредба со истиот период од 2019 година и изнесува 3.768 бракови.

Во ова тримесечје се добиени 357 извештаи за разведени бракови што претставува зголемување од 8.5 % во споредба со истото тримесечје од 2019 година.