Повредено лице при пукање на свадба во Гостивар

Триесет и едногодишен жител на гостиварското село Тумчевиште попладнево бил повреден од огнено оружје во пределот на вилицата. Првичните информации  зборуваат дека лицето било примено во гостиварската болница околу 15 часот со влезна рана од огнено оружје во вилицата, каде најверојатно му останал куршумот.

Повредениот присуствувал на свадбена веселба на ул „Мара Угринова“ во Гостивар. Како и под кои околности настанала повредата, дали се работи за заталкан куршум, невнимание или нешто трето, допрва ќе се утврдува. Како што соопштува портпаролот на СВР Тетово, Марјан Јосифоски местото на настанот е обезбедено и по овластување на јавен обвинител, увид ќе врши екипа од гостиварската Полициска станица по што ќе се знаат повеќе детали.

Повреденото лице заради сериозноста на состојбата, ќе биде префрлено на клиниките во Скопје.