Правила за гласањето – само круг, без штиклирање, чкртање и слично

На Локалните избори секој гласач ќе добие по две ливчиња, едно за градоначалник и едно за советничка листа. Гласањето се одвива зад параванот за гласање со заокружување на редниот број пред подносителот на листата, односно кандидатот и  тоа исклучиво со хемиско пенкало во сина боја. Гласачкото ливче ќе биде неважечко доколку има штиклирање, прецртување, допишан текст или било што друго освен заокружување. Исто така, гласачкото ливче е неважечко ако не е пополнето воопшто или се заокружени повеќе кандидати.

Редоследот на листите на кандидати ДИК го утврди со ждрепка. Прва на гласачкото ливче ќе биде СДПМ, втора Коалицијата Алијанса за Албанците и НДП, трета ДУИ, четврта Коалицијата за Битола – ДУИ, БЕСА и Алијанса на Албанците, петта Коалиција Заедно за Гази Баба предводена од БЕСА, шеста НДМ, седма ВМРО-ДПМНЕ, осма Народно движење на Турците, деветта партијата Алијанса за Албанците, 10-та е ТМРО, 11-та е Демократската партија на Турците, ГРОМ е 12-ти, Коалицијата предводена од ВМРО-ДПМНЕ е 13-та, БЕСА е 14-та, ДПА е 15, Левица е 16, ПДП е 17, Сојуз на Роми е 18, а СДСМ е 19-та.

Листите на кандидати за членови на совет и листите на кандидати за градоначалник, кои се поднесени од ист подносител ќе имаат ист реден број во сите општини. Во општината каде што нема свој претставник соодветниот број на подносителот ќе биде изоставен и на негово место ќе биде напишан редниот број на наредниот носител без оставање на празно место.