Прејадувањето после постот е токсиколошка бомба за организмот

Умерено и без претерување со храната и пиењето. Ова се советите на лекарите за празничните денови коишто следуваат и традиционално изобилуваат со полни трпези, калорични јадења и благо. Советите за умерена исхрана особено се однесуваат на оние кои постеле. За да не се појават проблеми со желудникот и со жолчката, воведувањето на мрсните продукти, како месо и јајца, треба да биде во помали количини.

Медицинските лица препорачуваат 100 до 200 грама месо во оброкот, многу салати, по можност свеж сок и да не се заборават супите. Особено е важно да не се прескокнуваат оброците, на пример доручекот, во исчекување на обилниот велигденски ручек и богатата трпеза. Долгото гладување во текот на денот ќе ве натера на непотребно прејадување, а преголемото количество храна предизвикува отекување на желудникот, премаленост и поспаност. Последиците може да бидат и посериозни за оние кои страдаат од хронични болести.

Варените јајца се неизбежен дел од велигденските денови. Лекарите сметаат дека дневно треба да се јадат 2 до 3 јајца максимум, со оглед на нивната висококалорична вредност.

Наглото обилно внесување на јадење и алкохол, значи токсиколошка бомба за организмот, потенцираат нутриционистите нагласувајќи дека на таков начин се зголемува ризикот од здравствени нарушувања.