Прес на СДСМ-Гостивар во пресрет на празникот 11 Октомври

„11 Октомври е ден на македонската историја, кој не само што е симбол на македонската борба за слобода, туку е и ден кога е поставен еден од темелите на македонската  државност. На овој ден им оддаваме почит на сите учесници во вооруженото антифашистичко и народноослободително востание. Наша должност останува да го чуваме она за што тие го дадоа својот живот“, порача на денешната прес конференција, носителот на листата за советници за Гостивар од СДСМ, Зоран Ангелов. Пресот, по повод утрешниот празник се одржа пред споменикот на паднатите борци од НОВ, во градскиот парк.

„На овој голем празник уште еднаш да се потсетиме дека борбата на денешните генерации гостиварци треба да биде посветена на економскиот просперитет. Борба за секое новоотворено работно место. Вложување во образованието, здравството, инфраструктурата, во изградба на патишта. Борбата на денешните и идни генерации продолжува да ги направиме Гостивар и Македонија попросперитетно место за подобар живот за сите граѓани“, рече Ангелов упатувајќи честитка до граѓаните за празникот.