Претставата на театарот од Лесковац прогласена за најдобра на МТФ „Отело“ во Гостивар

„Домот на Бернарда Алба“ во изведба на Народниот театар од Лесковац, Србија ја понесе наградата за најдобра претстава на седмото издание на Меѓународниот театарски фестивал „Отело“ во Гостивар. Сузана Грујиќ, која игра една од улогите во истата претстава, пак, ја доби наградата за најдобра актерка. Претставата е работена по текст на Лорка, а е во режија на Андреј Цветановски. Покрај Грујиќ играат: Маја Јанковиќ, Тања Крчмарик, Наташа Пејиќ, Мина Цоциќ, Петра Димитријевиќ и Радмила Коцевска. Драмата раскажува приказна за приказната за мајката тиранин и петте ќерки затворени под нејзина команда.

За најдобар актер на „Отело“ беше прогласен Никола Ристановски од МНТ, додека признанието за најдобар режисер го понесе Арбен Кумбаро за „Народен непријател“ на Тетовски театар.

На фестивалот изминатите денови се претставија три народни театри, МНТ и Народните театри од Косово и Албанија, како и три други државни театри од Лесковац (Србија), Габрово (Бугарија) и Тетовскиот театар.