Ден во гимназија Гостивар посветен на храната, хуманоста, дружењето…

Средношколците од гимназијата во Гостивар дел од овој ден го исполнија со подготовка, декорирање и послужување на храна, меѓусебно дружење и негување на хумани вредности. Во салата на училиштето се одржа посебен настан при што на штандови беа изложени разни видови на храна, традиционални специјалитети, овошје и зеленчук, десерти, природно подготвени сокови и слично. Активностите се организираа по повод 16-ти октомври, Светскиот ден на храната.

„Професорите и учениците се потрудија ова да биде навистина еден многу добар настан. Сите паралелки, без оглед на наставниот јазик се овде и заедно учествуваат, што е убава прилика да се дружат и меѓусебно да се запознаат. Подготовките течеа околу една недела и од сето тоа излезе убав настан, учениците имаат можност да научат нешто за традиционалните специјалитети, како и за здравата храна“, рече директорот на училиштето, Мирсад Исеини.

Освен средношколците и професорите, на настанот присуствуваа и претставници од општинскиот Сектор за образование.

„Ваквите настани секако се за поздравување, и освен што имаат за цел да ги вклучат учениците во подготовка на храната, имаат и хуманитарен карактер, па така собраните средства од донации ќе бидат наменети во хуманитарни цели, кадешто е потребно.“, рече раководителката на Секторот, Аслијан Снопче.

Светскиот ден на храната го предводи Организацијата за храна и земјоделство на Обединетите нации и акцентот се става на ублажување на неухранетоста и крај на гладта со која се соочуваат над 820 милиони луѓе ширум светот секојдневно.