Продолжува да паѓа бројот на раѓања во Гостивар, расте интересот за ВИП собите

Трендот на намалување на наталитетот во Гостивар продолжува и годинава. Бројот на новороденчиња континуирано бележи пад. Статистиката на гинеколошко-акушерското одделение во гостиварската болница покажува дека во првите шест месеци од годинава, има 33 раѓања помалку, споредено со истиот период 2022-ра година.

„Општа оценка е дека 10-тина години наназад бројката на раѓања, за жал се намалува. Заклучно со 3 јули годинава имаме 210 новородени, а лани до ист датум имало 243. Ако вака се движи трендот, може да очекуваме дека до крајот на годината разликата можеби и ќе надмине 50. За причините за пад на наталитетот сме зборувале милион пати, и тие се комбинирани, не може да речеме дека главна причина е тоа и тоа.“, вели раководителот на одделението д-р Агим Јакупи.

Од минатата година на одделението функционира и ВИП зона со еднокреветни соби опремени со сопствен тоалет и телевизор, кои може да се користат со плаќање. Се‘ повеќе родилки сакаат да ја користат оваа услуга, велат гинеколозите.

„Интересот на пациентките кои сакаат да ја користат ВИП зоната е голем, има раст на бројката на родилки со такво барање и интерес. Задоволни се, добиваме пофалби. Третманот од страна на персоналот за сите мајки е ист секако, но овие соби им даваат така да речеме, еден личен спокој, мир малку повеќе. Условите се подобри, затоа и се направени како ВИП зона со плаќање.“, вели д-р Јакупи.

Од вкупниот број родилки на гинеколошко-акушерското одделение во Гостивар, околу 10 до 12 % ги користат ВИП собите.